Market Insight:招商局有條件開車

近排股友真係忙,晚晚要追劇,晨早就要坐過山車,心情同個市一樣七上八落。周一以為人行降準托市,點知炒家趁好消息出貨。當以為丁蟹打低阿爺,周二可能仲要跌,港股又來個報復式反彈,將周一跌幅升凸。昨日攻兩萬八關,居然破位唔升,結論係港股徹底A股化後,就算明知大牛市,都要食定驚風散。

昨日大市埋單升83點收報27,933點,升幅0.3%,國指跑贏恒指,升138點報14,669點,升幅0.95%。前日期指大戶狂炒中移(00941)挾淡友,昨日中移抖氣,換騰訊(00700)、港交所(00388)及內險股接力,雖然恒指點數變動唔大,但非指數成分股炒到出煙,超過千一隻股票向上,升幅超過15%的股票有45隻之多。

喺幾日前,唔少後知後覺熱錢,未有入市idea實行買住ETF塞滿個倉,升市之下都無咁執輸,熱門ETF好似安碩A50(02823)曾經過百億成交,不過當近幾日市況終於去到雞犬皆升,安碩A50成交縮到去30億元,亦係好合理。

昨日的升市,不得不提阿里孖寶。周日第二大股東趙薇攞到香港電影金像獎影后,阿里影業(01060)咁啱斥逾8億元人仔收購影院票務系統供應商,昨日股份復牌升12.8%收4.22元,計落佢入股未夠三個月,手上股份帳面已賺超過50億元,認真雙喜臨門。同系的阿里健康(00241)昨日亦再發力,升12.3%收報13.82元,創收購天貓網上醫藥平台後的收市新高。

白酒股彈留意銀基

以最新股價計,阿里健康市值去到1,129億元,用乜方式計估值?古勝請教一位TMT分析員,都話唔識睇。依家阿里孖寶的炒法,十足十科網熱當年情況,面對呢類股份,散戶只能抱兩種極端的態度,保守的,套用方展博股神師傅的必勝心法──「及早離場」。但自問勇過清兵,贏一浪之後可能狠狠輸鋪杰的,追住資金動態,人炒你炒都未嘗不可。但要知風險之大,同過大海無異,自己定個可以承受止蝕位,一穿就要堅決離場計劃。

中證監話規管兩融唔代表想個市跌,加埋人行降準愈降幅度愈大,國家唔畀A股跌的訊息經已畫公仔畫到出腸。隨住A股狂升推動財富效應,因為反貪下死到直的內地白酒市場谷底反彈,貴州茅台(600519.SH)第一季報確認了價量回升的態勢,首季收入及純利均拗腰回升。

大行對今年餘下三季銷情及業績,有迹象呈一百八十度改變,瑞銀將目標價大幅調高四成去到310元人仔。影響所及,過去兩日內地白酒股鑊氣好勁,好似老白干酒(600559.SH)及山西汾酒(600809.SH)都連升兩日,本地隻銀基集團(00886)會唔會趁機炒一浸,睇佢股價無乜點郁過,值得留意吓。

南北車高位抖氣,大媽大叔都繼續搵重組概念股落鑊,昨日推介的中糧控股(00606)升23.6%,依家有重組條件,又股價仲喺可接受範圍的真係買少見少。昨日見到央企轄下的招商局國際(00144)成交異動,股價仍未破四月九日高位37元,似乎可以優先考慮。

招商系的地產及銀行,重組消息已久聞樓梯響,招商局國際股價升得唔多,顯然同今年首季中國外貿數字麻麻哋有關。

下載東網Money18 App搶先機

然而,受惠於「一帶一路」國策,大型基建企業未來有條件進行海外併購的,佢應該屬於「走出去」的熱門之一,而且一三年積極的海外併購成果,一五年開始陸續在業績上反映出好處。綜合大行預測,估佢業績會由一四年的45億元水平,三級跳去到一七年的大約71億元。

最重要係,以目前市帳率計,只係1.15倍,比海嘯時期低位0.95倍唔算高出太多,但卻遠低於十年平均的2.11倍,如果對近期炒重組概念的股份有畏高症,招商局應該係比較合理的選擇。

另外,港股持續暢旺,各位看官如欲掌握投資先機,請即在Android的Play Store或者iOS的App Store下載東網Money18 App,隨時睇到心水股票免費報價、A股報價及AH差價等,同時亦有專家即市推介,助你縱橫股壇。

古勝