絲絲講場：旭輝養老屋醫療勁Pro
旭輝（00884）主席林中計劃起適合養老嘅樓盤，有齊專業醫療設備。點專業法？就係有部吊喺天花板嘅運輸帶，幫啲長者喺屋內通屋「移動」。
聽林總講，旭輝正研究緊同醫療機構合作，旭輝負責搵地起樓，醫療機構就負責設備營運，入面啲設備就好似醫院咁，張床可以隨意移動，仲有部吊機可以運載行動唔方便嘅老友記。
構思適老公寓 首選京滬
林總話首選喺北京同上海搞，因為呢兩個城市嘅人均收入高啲。除此以外，旭輝仲構思緊託老服務同興建適老公寓，迎合60至70歲嘅長者，設計會考慮無障礙設施，兼會預留多啲空間放輪椅添。
余絲韻