同京東商城創辦人劉強東愛得高調又撲朔嘅「奶茶妹」章澤天，聽講又有新去向，無講話嫁入豪門，亦唔係返去電視台做小花，而係入創投基金紅杉資本，如果成事，真係會增加紅杉資本軟實力。
雖然呢個傳聞仲未經紅杉資本證實，但一眾網絡「粉絲」就議論紛紛，一時話奶茶妹雖然今年清華大學人文科學實驗班畢業，但入去紅杉係實習而唔係做長工，一時又話紅杉係京東股東之一，話劉強東推薦佢入去一啲都唔奇。
不過最開心、最抱有期望嘅，應該係一眾年輕創業者，個個都期待自己盤生意有日畀紅杉睇中，然後奶茶妹可以登門拜訪，大家飲住奶茶傾吓偈，幾好！各位老闆，努力加油。
余絲韻