絲絲講場：中國新女首富變港人？

絲絲睇番深交所資料，話呢位中國新女首富七○年出世，即係今年45歲，大學專科學歷，亦係「中國香港永久居民」，身份證號碼R******（*）。咦，「R」字頭？若果講緊係香港身份證，根據香港入境事務處話，「R」字頭即「持證人擁有香港入境權」，即係點？自己諗啦。

講番呢間藍思科技，係今個月十八號先喺深創板掛牌，到尋日係第九日上市，但就升足九日，之前嗰八日仲升停牌添！佢哋女掌門周群飛本身係大股東，身家隨股價暴漲。以尋日股價計，周掌門身家已過420億人仔（即約504億港元），已經爬過晒富華國際董事長陳麗華同碧桂園大股東楊惠妍頭，做咗新嘅中國女首富。

碧桂園大股東 楊惠妍

SOHO中國行政總裁 張欣

藍思主打手機屏幕

藍思科技升得咁勁，間公司究竟做啲乜？佢哋主力做手機屏幕，即是集蘋果、藍寶石概念於一身，夠晒啦。

中國女首富係點練成嘅呢？官方講法係：九三年（即係23歲）入玻璃加工行，「經長期實踐積累掌握了豐富的行業經驗」，到○三年（33歲）就創辦咗深圳藍思。嗱，通常富豪背後都有一段不為人知嘅奮鬥史。有有有，網上傳聞，周掌門出身湖南農村，15歲出城落咗深圳工廠做打工妹，跟住結咗婚，兼做女強人……總之就係經過無比困難咁奮鬥落去先有今日。係唔係好勵志呢。

余絲韻