絲絲講場：信銀大陣仗迎高端客

一張「黑卡」，絕對係身份嘅象徵。信銀國際都出咗張黑卡畀新成立嘅「鑽石財富管理」高端客。有幾高端？身家要有400萬港紙或者300萬人仔先得！

呢張卡就真係厲害，開幕日就出動到信銀國際母行信行（00998）嘅行長同三位副行長嚟撐場，好罕見。絲絲聽聞，母行舊年畀咗個任務阿仔，就係要將私人銀行搞得更有聲有色，今次阿仔推「鑽石財富管理」咁有成績，阿媽當然重磅撐場。

信銀國際執行董事兼替任行政總裁吳秋玉（Helen）話，依家內地有錢人好鍾意嚟香港投資，事關選擇多啲，所以母行各位高層都好重視跨境銀行服務。Helen希望成立「鑽石財富管理」之後，母行繼續介紹多啲客仔嚟香港，目標係母行轉介嘅高端客數目同資產，可以喺未來三年翻五倍！

余絲韻