絲絲講場:代理開「片」血淚交織

地產代理以前爭生意會爭到「開片」,今時今日「片」照開,唔開大片開「微片」。美聯早排搵同事親自出鏡,拍咗一系列短片《動起來》講當年奮鬥點點點乜乜乜。最初只打算喺周年晚宴播,點知內部反應好爆,覺得條橋好,索性放埋上網分享,仲喺一啲的士上播。試過有客坐緊的士時,認出片中主角做過自己張單添。

美聯奮鬥史超爆

美聯物業市場部董事陳婉嫺同絲絲講,啲同事最初唔願拍,驚要拍啲「公司好,公司無得頂」之類,結果出街之後發覺製作認真、反應爆、兼有客認得,所以依家,直頭排住隊爭住拍添。

東日Sell婆孫溫情

專賣日本樓嘅東日最近就玩微電影,今次唔同你講Yen跌啲樓有幾抵買,而係大Sell兩婆孫溫情,由八十年代香港屋邨情懷,到飛去東京實地取景。條Trailer大家可能已經喺電視睇過,不過足本版就上網先有得睇。

其實微電影呢條橋,中原都玩過,佢哋二○一三年拍咗套《緣途有你》,內容九個字講晒──地產經紀勵志血淚史,話改編自真人真事,仲由中原自己Staff粉墨登場,條片主要係畀公司自己友同埋同業睇。

拍微電影谷生意

近年唔少品牌都有拍微電影,絲絲硬係覺得微電影咪即係長版廣告,電視廣告費秒秒鐘計錢,想慳啲錢,就拍段長啲放上網。除此之外,廣告同微電影有乜分別?做過香港廣告商會(HK4As)主席兼現任中大傳播學院教授黃嘉輝話,喺網上播,(睇唔睇與幾時睇嘅)選擇權喺觀眾度。絲絲一句講晒,拍得唔好睇,放喺邊都無人睇。

余絲韻