期指觀瀾：破24557可追好倉
上周五，港股基本上是消化聯儲局議息前後的升幅，以及在周末之前先來一個調整，期指全日高低波幅170點，仍受制於24,532點，基本上好友對立即再攻穿周四的即市高位24,533點，積極性唔強，尾市在部分投機客不願持倉過市，陸續退場之下，期指跟住現貨級級落，日市收24,411點。
不過，上周五收市後的夜期成交唔多，但好友看着美股場外期貨愈升愈有，膽亦都大起來，在夜期挑戰短線阻力，最高見24,537點，最後亦以貼住高位的24,527點作結。
由ADR及新加坡場外莊家開價可見，今日期指承接上周五夜市收市價附近開出的可能性較大，問題是破位追抑或唔追。以恒指中期調整浪自25,101點跌至23,677點，0.618反彈阻力剛好在24,557點，若今日期指以24,500至24,550點之間開出，確認破位，以每日平均200點左右波幅，最樂觀的即市高位可以見到24,700至24,750點之間，短炒客確認破位追入，仲係有利可圖。
唯獨筆者最怕是已經連升多日，14日RSI開始踩入75的極超買區的A股，港股一直應跟唔跟，最怕去到跌至受A股影響，是追唔追好倉要考慮的風險因素，上星期成功食到24,000點樓下一浸，唔急於一時，今日決定睇多日至算。
John Mullen