絲絲講場：參賽贏住股神舊居
股神巴菲特嘅投資策略大家未必跟到，但相信每個投資者都希望吸收佢啲靈氣嚟增加財運。Airbnb搞咗個比賽，勝出者獲安排五月一至四號呢四日三夜期間，即巴郡股東大會前後，免費入住喺巴郡總部奧馬哈市嘅股神兒時舊居，話唔定瞓到佢長大嗰間房添！
不過要住股神舊居絕對唔易，要先證明係巴郡股東。絲絲醒醒大家：巴郡A股前日收報21.86萬美元，折合約170.5萬港元。
Airbnb搞比賽揀粉絲
然後，仲要講述嚟奧馬哈乜事會令你興奮、巴郡股東大會最期待啲乜、用Airbnb最開心邊次、下次最想去邊度旅行，四條問題每條答200字，當然要係寫英文啦，比賽四月一號截止。
話雖如此，適逢今年係股神入主巴郡五十周年，朝聖巴郡AGM嘅股東預期會破紀錄超過4萬人，巴郡總部附近嘅酒店據報已經差唔多爆晒，所以股神都鼓勵怕住宿貴嘅股東去Airbnb撞吓彩！
余絲韻