絲絲講場：李寧搞智能鞋 手腳並用
科技日新月異，絲絲都知呢句說話聽落有啲行，但呢句又真係好真實。市面愈出愈多智能乜乜乜，一個二個運動品牌都同啲Tech公司Crossover。內地運動品牌李寧（02331）尋日就喺官方微博宣布，同小米手環嘅母公司華米合作推出新一代智能跑鞋。
361度童鞋跟貼細路
呢款智能鞋含有智能晶片，仲可以同小米運動移動端App相連，記錄穿着者嘅運動過程同數據，教埋你點跑，會喺今年第三季出。聽落好High-tech咁，幾錢先？李寧嘅負責人話，價格走親民路線，希望所有中國人都可以輕鬆買得起咁話。絲絲心諗，依家全世界最有錢好似係中國人喎。
不過，其實智能鞋亦已經唔算係最新嘅嘢。早兩個月，另一個內地運動品牌361度，就孖住百度出咗「智能童鞋」，特點係除咗可以監測小朋友身體狀況外，仲有防拐功能。
智能鞋有定位技術，配合百度地圖LBS平台，可以定位追蹤住啲小朋友，一離開監控範圍就會通知父母。唔知有無考慮出情侶款呢？話唔埋市場仲大！
余絲韻