對沖國度:應升唔升後市要小心

已發展到美股升港股唔升,A股升港股一樣唔升的地步,港股投資者實在無辦法唔愈炒愈頹。美股升港股無反應,是因為美股近期每次上升都非常集中,迪士尼、大銀行又或者蘋果公司升,對港股大盤根本無拉動作用。

至於A股市場擺明是閂埋門一家親格局,內地投資者打骰,喜歡點開就點開,AH差價再次拉闊,說明了外資完全不認同,所以A股勁勢幫助有限。

上周尾段應升唔升,便要小心反過來會跌勢加速,這星期幾家大藍籌出業績,加上聯儲局會議聲明,隨時風起雲湧。星期五又到美股結算,且就快是第一季度埋數,過往經驗市場波幅在這段時間會增加,配合上述連串事件,有望打破悶戰狀況。

最近港股雖然是跌,卻是陰乾走勢,反反覆覆,跌得甚慢,買貼價Put尚且有得贏,買價外Put只是得個吉。不過,現在應該改變策略買行使價較遠的價外Put,例如恒指23,000Put,付出較低成本以小博大。

其實在最近兩三個交易日,港股期權時間值消耗開始止跌,和大盤回穩走勢不符,反映市場是外弛內張,加強防風措施。

自己對於港股雖然中長線放棄,但在目前水位睇得太淡是有戒心,始終是一個長期上落市,短期走勢更差也好,在大支持區域低位睇淡是危險,所以用價外Put投機最合適,即使不中也無傷大雅,回報則有機會喜出望外。當然假如港股不跌反升,有一次較強勁技術性反彈,便應趁機會減持。

豐盛金融資產管理董事 黃國英(作者為註冊持牌人士,基金持有蘋果公司、迪士尼正股及Call、恒指Put)