金管局出招收緊按揭，難免增加投資客的入市成本。不過，細價盤始終好收租，仍具一定投資價值。想在西鐵元朗站附近搵個收租盤，位處雞地的好順意大廈絕對有得諗，坐擁鐵路優勢，啱市區返工的年輕租客，以現時入場費280萬元計，租金回報率料逾3.6厘。
雞地一帶舊樓林立，位處其中的好順意大廈，以往未必是市區上班族杯茶，但隨着西鐵通車，從屋苑往西鐵元朗站約十分鐘步程，搭西鐵出市區快捷方便，加上屋苑對開的大型屋苑YOHO Town落成後，環境即時「升呢」，自然吸引市區上班的年輕租客。
起居生活方面，好順意大廈離人流最旺的元朗市中心不遠，傳統、新派食肆樣樣齊，擇居在此大飽口福。至於西鐵元朗站旁更有大型商場，近年改頭換面走中高檔路線，Shopping、睇戲話咁易。
屋苑由兩座大廈組成，樓齡雖逾30年，但近年已翻新外牆及大堂，內外見得人。物業主攻細戶，實用面積雖不足300方呎，內籠的骰，但兩房開則，跟朋友夾份租都有自己私人空間。美中不足是，單位管理費約500餘元，會拖低租金收入。
中原陳家豪表示，好順意大廈長期缺盤，加辣後業主叫價仍硬淨，現時放盤約五個，入門交吉盤為中層戶，實用面積266方呎，裝修企理，現叫價280萬元，以現時市值月租8,500元計，租金回報率料逾3.6厘。