絲絲講場：楊主光賣舊股上繳太座
今日開始招股嘅香港寬頻（01310），佢哋嘅行政總裁楊主光（William）絕對係一名「愛妻號」。William趁公司上市套現手上20%舊股，咁究竟售股所得嗰筆錢會點用呢？William就笑笑口話「交畀老婆管理」。
套現半億當元宵禮物
嘩！William真鬼馬，股份截飛日係三月四日，之後第二日就係正月十五，即係中國情人節，呢次套現算唔算係畀William太座嘅元宵節大禮呢？再望一望招股書，佢總共賣638萬股，按招股價上限9蚊一股計，就套現最多5,742萬。嘩嘩嘩！半億有多！
點解要減持？William話「要錢」喎，想手揸現金。但佢就話，手頭上剩低嗰80%股份，一半禁售一年，另一半禁售兩年。不過，財務總裁黎汝傑（NiQ）今次冇賣股。
加國基金或變大股東
其實今次香港寬頻全賣舊股，除咗William有賣之外，大股東私募基金CVC亦放番部分股份。
另外值得留意嘅係，加拿大退休基金CPPIB以基礎投資者身份，有望入主成為公司最大單一股東。
William話，唔知CPPIB遲吓會唔會再增持。NiQ就話「公司喺3年前已經Date CPPIB o架喇」，佢相信對方只係財務投資者，而唔會成為營運投資者。
余絲韻