絲絲講場：大摩《Hunger Games》竟變現實版
呢幾日華爾街熱話，必定係一條大摩拍嘅短片，係佢哋班投資顧問仿照熱爆全球嘅電影《飢餓遊戲》（The Hunger Games）嚟拍，連名都抄足電影，叫《Margin Games: Manager on Fire》。
條片全長10分鐘，講啲乜？個序言係咁嘅：「金融危機後，每個分部被迫每年交出兩個經理作『貢品』送去總部，呢啲經理會喺嗰度進行飢餓獵殺，鬥至你死我活，直到只剩最後一個……」
高層「中箭」弄假成真
條片裏面，有經理畀人喺背後放冷箭，死咗都未知乜事，仲唔眼閉嘅添；又有識功夫嘅亞裔女經理，隨手由個髻度拔出一支支織針作飛鏢，置人於死地。
條片本來諗住喺分行經理大會上播放，等大家「輕鬆吓」咁話；但結果，條片抽起咗無放。
點解？大摩冇答喎。不過，據絲絲所知，嗰次分行經理大會之後兩個月，大摩就進行「精簡架構」，有啲喺條片內粉墨登場過嘅董事同經理，亦真正成為咗「犧牲品」！好邪喎。
余絲韻