絲絲講場：致富派利是意頭有價
尋日係港股羊年首個交易日，致富證券高層逐間分行派利是，其中大圍同旺角分行嘅現場氣氛更係熱鬧非常。除咗人人有份嘅開年利是之外，致富今年仲特別準備咗三封「大利是」，分別係名為「五福臨門」500港元利是一封，以及名為「一擊即中」100元人民幣利是兩封，寓意股民可於股壇「一擊即賺」。
亞博開工送八達通
股友李太係抽到「一擊即中」嘅幸運散戶，佢話今年係首次抽中大利是，原本佢冇諗過買A股，抽到證券行派嘅人民幣利是咁好意頭，會考慮拎十幾萬買A股長線投資。
而亞洲博覽館就向近200名員工派50蚊開工利是，仲有增值咗100蚊嘅亞博十周年八達通，每張印有員工編號，獨一無二。亞博呢排做周年聚餐同會議做到氣咳，最盛大嘅係建築公司AECOM，上月筵開逾300席，當晚請近千名散工，一次過上三百幾碟魚真係勞師動眾。
余絲韻