絲絲講場：股神座駕 7.8萬起拍
講開股神巴菲特嘅慈善拍賣，好多人會即時諗起同佢食晏嘅拍賣價行情。不過今次巴菲特拍賣嘅係佢部座駕，除咗股神巴菲特喺錶板附近親筆簽名外，為咗做善事巴菲特仲會親自交車畀新買家，起拍價仲只係驚喜價一萬美元（約7.8萬港元）咋，抵呀！網上拍賣將由今日起至十八號。
呢部○六年款嘅卡特力DTS，講牌子香港人應該冇乜人識，但原來係美國身份嘅象徵，美國總統包括奧巴馬、喬治布殊、克林頓都以呢隻牌子嘅車做官方座駕。絲絲上網查過，依家二手價大約要7,000美元一部。
巴菲特簽名 親手交車
不過今次拍賣呢部有股神坐過，點都貴氣過人。大家都估計，大陸富豪實爭住搶。不過，拍賣價唔包送貨，如果要從股神手上收車匙，就要飛去美國奧馬哈市。而善款所得會捐畀美國一個關於女性嘅慈善組織。據講巴菲特○四年過身嘅第一任太太Susan Buffett係呢個組織嘅創辦人之一。
絲絲喺度諗，今次股神賣車，除咗親筆簽名同親手交車外，會唔會附送投資心得呢？
余絲韻