絲絲講場：超級首置客8500萬掃紅山
尋日華懋嘅大潭紅山半島賣樓，絲絲發現紀惠集團行政總裁湯文亮同佢個千金湯振玲Jacqueline出現喺華懋荃灣總部嘅商場售樓處，佢哋簽完單後一齊行出嚟，Jacqueline笑笑口話自己今次喺首次買樓，仲要係頭籌。由於係首次置業，可以有稅務優惠。
湯文亮千金一買四伙
今次佢用咗大約8,500萬，一口氣掃咗4個單位，包括第3座2個頂層天台戶，及6樓全層，連同6個車位。絲絲同佢計吓，今次至少慳咗300幾萬雙倍印花稅。
Jacqueline精打細算之餘，身為地產界資深投資者嘅爸爸湯文亮，自然有份做軍師啦！
Jacqueline就同絲絲講，依家居屋呎價都要過萬，啱啱買嗰批6樓單位只喺2萬蚊，同埋爸爸一向有投資「磚頭」，都話個價好抵，仲有呢區校網好，睇好單位升值潛力同租務市場，咁咪買幾個單位收吓租囉。佢仲話，本來想揀5間，最後揀咗4間。計吓條數，4個單位同一個契，又真喺慳番好多稅。
棄投行 打理家族生意
唔好睇Jacqueline出身名門，原來佢都好「巴閉」，當年會考攞6A3B，拔尖入科大王牌課程「環球商業管理」，之後○六年大學畢業加入跨國投資銀行，年薪幾十萬，但無耐就返家族公司幫手啦，依家已經係紀惠集團執行董事。
紅山半島首批賣50伙，折實平均呎價20,899元，尋日先賣22伙，華懋話賣咗21伙。
余絲韻