上年暑假冰桶挑戰風靡全球，大家更可一睹世界名人以至超級富豪們，好似facebook朱仔、微軟蓋茨等一個又一個咁變成「落湯雞」，為全世界嘅人增添樂趣之餘，亦都為「漸凍症」病人籌得合共1.15億美元款項。
冰桶挑戰咁成功，當然有唔少機構爭相模仿，希望以此方式獲得大眾關注喇！今年伊始，一個美國嘅慈善機構Schoola，就發起一個名為「Passthebag」嘅挑戰，參加者可以喺Schoola網站上面申請一個捐贈袋，然後將一啲唔要嘅女性或者兒童衣物放喺袋入面捐給Schoola，之後呢一個機構就會將收集到嘅衣物賣出，以賺番嚟嘅錢為一啲有需要嘅學校增添新設施。
Scholla創始人Stacey Boyd就成為咗呢項活動嘅發起人，身先士卒參與呢項挑戰，之後又點名facebook首席營運官桑德伯格、Linkedln嘅傑夫維納同埋Creative Artists Agency創始人Michelle Kydd Lee參加挑戰。桑德伯格同維納都已經率先接受咗挑戰添！
余絲韻