絲絲講場:送百萬搵租客咁筍?

近排零售氣氛麻麻,核心購物區多咗好多吉舖,連香港最貴舖租嘅銅鑼灣都有吉舖,業主都要出招搵客。絲絲尋日行開銅鑼灣,發現喺時代廣場後面嘅耀華街有個吉舖招租,仲話有價值超過一百萬嘅租金優惠。

變相免租近八個月

代理香港置業許諾謙話,依個耀華街16號地舖吉咗成年,實用面積約600方呎,原先以每月15萬元放租,依家只要租戶簽三年約,業主會提供包括5個月免租期,如果做食肆嘅話,再送多1個月免租期,同埋仲有「紅日」經營資助,所有紅日只係畀一半租金(唔計禮拜六、日),加加埋埋總值約115萬元,差唔多免咗近8個月租金,比一般得40日免租期多咗好多。

余絲韻