一年一度嘅亞洲金融論壇將於下個禮拜一同二（十九及二十日）喺香港舉行，呢個金融界盛會，一向邀請到唔少重量級人物出席，今屆亦唔例外，其中今年嘅焦點之一，應該係中證監主席肖鋼嚟做演講嘉賓，絲絲雖冇水晶球，但都估到市場熱切期望佢會講吓市場依家最關心嘅深港通進展、同埋醞釀多時嘅中港基金互認幾時可以出台等等。
至於已推出近兩個月嘅滬港通，上交所總經理黃紅元亦會抽空來港，同港交所（00388）行政總裁李小加，出席論壇嘅滬港通專題工作坊，兩人台上chit-chat，唔知會唔會擦出火花？
至於近期嘅新聞人物滙豐香港「一姐」馮婉眉，佢係論壇嘅策劃委員會主席，下星期自然會出席，令到今屆論壇更添話題性。
亞洲金融論壇今年已係第八屆，料有逾2,400名環球財金官員、金融界等出席。
余絲韻