絲絲最近聽聞有個人十幾年前借咗50萬元人仔畀騰訊（00700）主席馬化騰，之後收番全數還款，但就一直後悔到依家。話說當年呢個內地IT財俊同馬化騰喺同一幢樓做嘢，馬化騰四圍撲水，想將公司賣畀新浪搜狐，點知冇人吼，最後就向佢借咗呢筆50萬救命錢。然而，佢錯就錯在當年嫌棄QQ，唔接受馬化騰以騰訊股份當還款，如果唔係，依家都唔知賺咗幾多百倍回報囉。呢個財俊名叫李黎軍。
如果新一代型男嘅定義係名牌大學畢業、創立到間成功嘅startup同有錢，李黎軍絕對係。李黎軍畢業於清華大學，曾經係深圳十大傑出青年，後來創立咗內地知名互聯網增值業務公司傲天，亦係個天使基金投資者。
佢幾年前推出咗嘅手機App「航班管家」，提供航班查詢、機票、酒店預訂等一站式服務，依家已經係內地最受歡迎嘅旅遊App。但李黎軍曾經拒絕攜程網同小米雷軍收購「航班管家」，傅聞雷軍最近終於成功入股。如果第時雷軍幫到「航班管家」去美國上市，唔知又可唔可以彌補到李黎軍當年唔收騰訊股份走寶呢個遺憾呢？
余絲韻