小米上星期推完紅米2，市場滿以為尋日舉行嘅北京新產品發布會係公布小米5，被外界稱為「雷布斯」嘅小米創辦人雷軍就畀個驚喜市場，新推出嘅旗艦機原來係小米Note，其中售價3,299（人民幣‧下同）嘅頂配版，更為市場視為單挑蘋果公司（Apple Inc.）舊年九月推出嘅iPhone 6 Plus添！
今次推出嘅小米Note屬5.7吋嘅大屏幕智能手機（iPhone 6 Plus是5.5吋），但定價果如雷布斯早前透露唔再係市場見慣嘅1,999元。小米Note最平售價係4G雙卡雙待嘅16G版本，售價2,299元，而64G嘅售價為2,799元，至於被視為單挑iPhone 6 Plus嘅64G小米Note頂配版，就屬雙卡雙待款式，支持最新4G網絡LTE-CAT 9，不過定價係3,299元，即係折合逾4,100港元。
雷布斯喺發布會上用咗近40分鐘講解呢款手機嘅機身設計，仲話經過測試，能夠抵禦日常跌落地下嘅撞擊，絲絲聽落就覺得呢句說話好似針對蘋果公司近年新款手機跌落地就爆玻璃嘅弱點。為咗令用家用得更得心應手，小米為呢款手機推出每年199元嘅意外保，無論係爆屏、前後玻璃損壞同埋入水都係保養範圍（iPhone入水即無保養）。
另外，小米Note嘅鏡頭設計據講技術更勝iPhone 6 Plus，就係後置鏡頭位做到內嵌式（iPhone 6 Plus是突出，較易弄花鏡頭），而小米Note前置鏡頭像素亦勝一籌，有400萬像素（iPhone 6 Plus得120萬像素）。
今次小米Note頂配版走高檔路線，定價逾4,000港元，比iPhone 6 Plus 64G賣7,188港元仍舊便宜達3,000港元。不過內地網民就好似唔多受落，有網民話無指紋又無NFC，認為無賣點。但亦有網民認為，部機咁貴到時應該好易買到啦！
余絲韻