孖妹S檔案：財金女強人教路抗「息魔」

加息未必跌市 亞股看俏

范：瑞信私人銀行及財富管理亞太區首席投資總監兼董事總經理 范卓雲（阿Fan）

彩兒：好多市場人士都估今年加息，孖妹唔係有樓一族，唔怕加息，反而想加息後震低吓樓價，等我哋班姊妹有得上車。你幫咁多超級大戶管錢，對今年加息睇法，一定眼光獨到啦。

范：聯儲局主席耶倫喺去年最後一個議息會議話「對加息保持耐性」，相信聯儲局調整利率政策時會保持審慎，加上目前美國經濟復甦動力相當理想，我哋更預測美國今年GDP增長會由去年嘅2.3%升至3%，所以預計聯儲局會喺今年六月首次加息，全年加息三次。

Kitty：息魔殺到，股市一定無運行？會唔會咁簡單先？

范：如果要比喻一個因素對環球股市嘅影響力，十分入面，加息應該都有七至八分，但其實投資者唔需要過份憂慮，因為聯儲局只係逐步將利率正常化，而唔係大幅收緊貨幣政策，所以短期內市場相對仍處低息環境，而且加息亦代表經濟復甦前景理想。低息環境及經濟復甦前景理想，都有利企業盈利增長，所以通常加息初期，都無損股市上升動力。我認為，股市仍然係今年最吸引嘅市場，環球股市喺年初會先整固，然後再重拾升軌；亞洲股市當中，我睇好中、日、印、台。

彩兒：中、印股市去年回報都非常可觀，睇嚟今年可以繼續押注！

范：係呀，由於近期油價大跌，降低咗中、印兩國今年嘅通脹預期，間接為佢哋提供空間實施寬鬆貨幣政策，所以其實左右今年金融市場發展嘅最大關鍵，應該係各國央行貨幣政策嘅差異。喺投資股市時，就要更注重行業嘅選取，受惠美國復甦及油價下跌嘅板塊都值得睇好，前者有美國金融及科技行業，後者有航空、運輸、工業及汽車。

中資金融H股值博高

Kitty：以往加息周期，股民都會避開本港地產股、REITs（房地產投資信託基金）、債務高嘅中資股等，但今次策略係咪要調整吓？

范：重債嘅中資股當中，好視乎間公司借嘅係咩債，如果係人民幣債，由於預計人民銀行會進一步減息，所以利息開支反會節省；而美元負債較高嘅航空股，則可受惠燃油價格大跌，以抵銷美國加息令利息成本上升嘅負面影響。地產股如華潤置地（01109）及新地（00016），若從估值看，其實都有投資價值。

值得一提，中資金融股去年底因人行減息而大升，我預期升勢最少可持續至今年三月份嘅人大會議，而且部分A股已較H股出現溢價，所以中資金融H股更值得吸納。不過，由於息口敏感股喺恒指佔比較多，預期年中美國加息時，港股會特別波動；恒指全年目標25,000點，國企指數則為12,800點。

美通脹壓力低 加息唔急

喻：凱利投資基金經理暨董事 喻進（Jean）

Kitty：股民一聽到加息就驚到腳軟，孖妹有啲散戶朋友，仲話因此唔再遊戲「魚缸」喇！

喻：由美國宣布退市以嚟，市場一直都好關注加息嘅問題，其實都可以理解，因為息口會影響各類資產價格走勢。不過，目前美國通脹壓力低，聯儲局毋須急於加息或大幅加息，相信佢哋會喺唔阻礙經濟增長嘅前提下逐步加息，所以預期未來美國嘅經濟增長動力會持續，投資者毋須過分擔憂。我認為，雖然加息係今年投資市場嘅大主題，而且對股市會有影響，但影響始終比債市少。再者，美元強勢、各國央行貨幣政策分歧、國際油價波動等議題，同樣值得關注。

彩兒：近年美股狂升，但可惜孖妹無買，今年先搭尾班車係咪已經無着數？

喻：其實美股過去幾年累積升幅都唔少，未來嘅上升空間相對下降，所以個人投資回報將更視乎投資者嘅選股能力。金融股係我會增持嘅板塊，因為佢哋係加息周期下最明顯嘅受益者，可以受惠息差擴闊、經濟增長帶動貸款需求增加等，且金融股目前係估值最低嘅美股板塊之一。另外，我亦睇好美國科技股，即使好多人認為行業已開始衰落，但其實佢哋近年都不斷投資及拓展新興業務，如雲端、大數據等，都會推動盈利未來繼續增長。

Kitty：咁有咩板塊係需要避開？

喻：傳統上，投資者會避開REITs、公用股等，都好合理，因為佢哋嘅吸引力在於高息，而息口上升，會令佢哋嘅回報相對變得唔吸引。再同你分享吓來自經濟研究機構BCA Research嘅發現，佢哋話喺過往加息周期中，周期性板塊一般比防守性板塊嘅表現好，即賭股、基建股等，應該會跑贏醫藥股、軟性飲料股等。我相信係因為防守性板塊，對經濟增長嘅敏感度較低。

美股估值合理非泡沫

彩兒：孖妹記得，去年已經有市場人士擔心美股過熱，出現泡沫爆破。最近，我仲聽到有外國對沖基金經理指，美股短期可能會大跌五成！

喻：我認為，美股目前唔係處於泡沫狀態，估值只係跟歷史水平相若，加上市場對美國經濟增長前景樂觀，所以我唔相信會出現咁大嘅調整。

Kitty：你依家同拍檔Sam Peters管理緊嘅美盛凱利價值基金（Legg Mason ClearBridge Value Fund，前稱美盛價值基金），來頭一啲都唔細，喺一九九一年至二○○五年間，連續十五年跑贏標普500指數，而過去三年回報亦緊貼該指數。今年有無信心基金再跑贏大市？

喻：該基金組合嘅股份估值都比指數成分股估值低，但就有較好嘅增長潛力，所以我覺得有條件、亦相信今年可以再次跑贏。

彩兒：Sam Peters係邊位？咪就係人稱「新股神」米勒（Bill Miller）嘅徒弟囉！佢仲曾經同米勒合作管理上述基金！

高妹、彩兒

若有料報畀高妹同彩兒或有嘢問，可電郵money.biz@opg.com.hk