Market Insight：吉汽最壞時刻已過

究其原因，一來係美股在數據公布前，周四曾因芝加哥聯儲銀行行長埃文斯認為美國通脹一段時間內都無法達到2%的目標，聯儲局不需急於加息的言論，刺激美股偷步爆升，周五不過是數據曝光，搵獲利回吐藉口。

另外，十二月就業數據其實有點乍暖還寒，非農職位增長唔錯，之前月份也獲向上修訂，但美國打工仔容易搵工，唔等於份工好pay，薪酬趨勢顯示，十一月強勁增幅向下修訂之外，十二月更按月跌0.2%，同市場估計0.2%升幅有頗大出入。

古勝冇點你2015/01/12

萬里長空

雖然話投資者都樂見美國經濟穩步復甦，最理想係力度唔好太強，免得觸碰到聯儲局提早加息的緊急制，但講到工資趨勢逆轉，就唔同講法，尤其內部消費佔美國經濟比重近三分之二，打工仔得個「做」字，荷包唔漲對消費市道無好處。

上周五美國國債孳息曾經抽上2.02厘，最後低收1.97厘，結合股市，反映投資者唔怕加息殺到埋身，反而驚美國就業市場復甦未及想像中咁理想也。

重組利釋放價值

上星期大新聞，一定係長實（00001）及和黃（00013）重組，為滬港通後平淡乏味的魚缸提供話題。話說兩間公司，會將地產以外業務先併入長實，之後以新公司長和持有港口、電訊及零售資產；同一時間，所有其他地產、收租項目，房地產信託基金等獨立分拆成新公司長地。

依家成個香港政治氣氛籠罩，傳媒鎂光燈聚焦新公司，再唔係香港，而係一如近年上市公司流行，選擇在英屬開曼群島註冊。唔少人將遷冊與撤資畫上等號，古勝唔係超人肚裏條蟲，有冇咁諗只有超人至知。牌面事實，要長實先吞和黃，或者和黃吞長實，再重組分拆地產業務出嚟，在現行香港公司法之下，技術難度好大，由於長和資產規模太大，就算夠retaining earning為實物分派沖銷，以後都好難避免影響派息，用開曼群島註冊公司去做，確實是比較簡單且可行的辦法。

總會有陰謀論，認為重組可能係睇淡地產或者赫斯基能源，其實後者近期跟住油價回落，與去年六月高位比跌咗三成，股價返回一二年水平，查實唔貴。但姑勿論點，純以技術層面出發，以往兩間公司地產投資，慣例長實、和黃各一半，形成長實經和黃持有的項目，長期出現較大控股公司折讓。

內銀股要抖抖氣

今次一鋪過由垂直式架構，變番平排拆開兩間公司，最大好處係可以瞬間釋放到以前寄居和黃下面的地產項目的價值，而其他非地產項目，亦都可以用番市價PE計數，唔使再打個折頭。瑞銀同長和計數，長實、和黃加埋注入的6.24%赫斯基，資產淨值8,530億元，以上周五佢哋市值6,700億元，大數計折讓21%。

上周五預託證券彈咗一成，反應是預期內，睇唔到街外股東有抗拒重組理由，今次係比較好機會清楚兩間公司未來分工，小股民亦可按自己喜好揀番地產或者非地產生意，唔使再食炒雜燴。

上周五A股尾市隊得誇張，升市火車頭內銀股似乎要抖抖氣，無咁一面倒，對之前調整的非中資金融股反而有利。醫療及航空股都見鑊氣，國際油價連50美元都失守，一日唔企穩回升，一日新能源股都無古仔去博，反而古勝都仲係有興趣睇傳統汽車股，之前因為俄羅斯盧布插水出盈警的吉利汽車（00175），近日見逐步收復失地，由盈警後低位2.4元，去番上周五2.79元，仲同3.12元插水前有一成一距離。

業績料見底回升

睇番十二月份的銷售數字唔錯，總銷量5.5萬輛，按年少一成，但按月計升23%，主要係重塑品牌後的新推車款EC7及新帝豪賣得幾好，上月賣出2.58萬架，GX7、SX7及EC7三款主打的高毛利車款，佔整體銷售比例升到六成，比首三季的五成二有改善。

按趨勢，有利一五年業績見底回升，管理層的一五年銷售目標為45萬輛，比一四年多8%，估計今年每股盈利約31分人民幣，計落市盈率7.2倍，以內地自主品牌市佔率開始回升，而吉汽業績最壞時間又過咗，博股價上番3.1至3.3元之間，應該唔算奢望。

古勝