絲絲講場:內地生夠搏 許照中至愛

「有人辭官歸故里,有人漏夜趕科場」。尋日渣打宣布即時結束包括證券研究在內嘅業務,咁啱得咁蹺,六福金融主席許照中同日就話公司新近成立證券研究部,仲請咗三名生力軍,並且公開亮相。呢批生力軍,都係喺內地大學畢業,再喺香港讀碩士,許照中仲話,鍾意請內地畢業生,貪佢地夠上進!

專門分析中港股市

吓?言下之意,佢係咪話我哋香港嘅大學畢業生唔及內地進取上進?佢冇正面評論,只係話覺得內地畢業生喺證券技術分析上落好多工夫,做好多鑽研。

話時話,睇番過往歷史,咁耐以嚟,許照中真係好少請所謂「財演」(財經演員)嘅人!許照中話,滬港通開車後,更加需要深入嘅A股、港股分析。呢班年輕人,好啱佢口味!

六福金融未來仲有大把嘢搞,包括增資大計,除咗現有股東泵水外,佢都希望有新資金加入,如意算盤就梗係想有內地資金睇中佢哋入股喇!

余絲韻