孖妹S檔案:教你股海數浪 大師預測2015

「波兒、波兒、波兒,魚兒小寶貝……」孖妹鍾意波兒,除咗因為佢卡哇伊(日語:可愛)之外,另一個原因係貪佢個名啱feel!你懂的,散民至愛就係喺股海波浪中尋寶,其實我哋最近研究緊波浪理論,仲搵咗兩位波浪大師幫手捉浪添。

港股已步入A浪下跌

林:中國經濟專家 林一鳴

Kitty:聽聞你近來棟高床板捉浪,可唔可以教我兩道散手?

林:喺波浪理論嘅基本節奏入面,簡單嚟講熊市會分開ABC三個浪,A浪係轉入熊市嘅首個下跌大浪,隨後嘅B浪就係反彈嘅「牛市陷阱」,最後嘅C浪就係「終極一跌」。恒指喺舊年九月四日嘅25,362點見頂,目前走勢轉弱、跌多升少,在上升時乏力、下挫時則跌得異常地急,但係唔少投資者仲深信大市有支持,抱住樂觀態度。

我認為,港股已經進入A浪,開始踏入熊市,而且聰明嘅基金及外資過去數月已減磅,預料恒指今年會跌穿20,000點;反觀,資金持續流向內地,A股今年可上望4,000點,想賺錢最好就北望神州啦。

彩兒:近排A股爆升,H股就升得嗰少少,有啲衰起上嚟仲倒跌添!

林:A股近十年未大升過,令海外投資者覺得A股吸引啲,仲有多啲炒作機會;再者,內地幣策已由極度收緊轉為中性,目前此因素牽動A股上升嘅力量遠超經濟數據及企業業績,所以A股更吸引到內地以至海外資金停泊,亦將資金抽離港股。

恒指去年變幅近零,H股指數則升近一成,粗略計算,撇除H股升幅,港股實質跌幅近一成,反觀A股自去年底減息至今已爆升三成。我預計,今年A股同港股會出現背馳走勢,睇淡港股今年表現,建議趁高減磅;但係滬綜指由牛皮市轉入慢牛市,首站為3,500點,如果近期一旦調整至3,000點水平更應趁低吸納。

炒A股要睇政策概念

Kitty:A股係政策市嚟,用波浪理論嚟捉浪Work咩?

林:完全唔準!喺研究A股時,基本因素同技術分析等都唔啱使,最重要係講政策、講概念,主力炒板塊而非精挑個股!消息最重要來源係領導人嘅「口風」,所以投資者需極其留意領導人發言嘅語調及言詞去推敲政策嘅力度,培養個人對消息嘅觸覺同敏感度,仲應該試吓預測未來政策。

例如內地慣性於一月推出「一號文件」,市場會熱炒農業板塊,目前中央力爭推動農村改革,一月中旬不妨部署炒番轉,不過即使香港都有農業股,爆升力度遠追唔上A股。

彩兒:內地今年踏入第十三個五年計劃(十三‧五),我哋咪可以大炒特炒?

林:十二‧五嘅改革紅利將逐步釋放,經濟會由高增長走向中增長,內地經過四萬億人民幣救市措施後,基建及鐵路板塊出現產能過剩,政府近年相關支出都係住嚟使,但隨住「一帶一路」措施帶挈,預計板塊會繼續做好。

內地人均GDP為6,995美元,預料二○二○年可達11,000美元或以上,相信內需及新能源股將會是「十三‧五」計劃下嘅另外兩大得益者。值得留意嘅係,中國能源消耗目前只佔世界約兩成,但基數比西方國家低,增長潛力巨大。

Kitty:咁你個人會點炒?靜靜雞話我知就得喇,唔使話畀彩兒知。

林:今年我會將股票組合中嘅A股比例增至一半,希望靜候A股回調至3,000點再加碼,由於A股選擇太多,到時會善用南方A50(02822)同埋安碩A50中國(02823)等ETF工具捕捉升浪。

全球政經陷多事之秋

許:怡發資產管理董事總經理 許沂光

彩兒:你一向擅長以波浪理論、形態分析、循環周期同埋市場情緒分析金融市場走勢,最近有乜高見?

許:俄羅斯央行喺舊年十二月中旬緊急加息6.5厘至17厘,就好似發動經濟戰爭咁,根據循環周期分析,戰爭及美國革命周期都已經見底回升,全球政治及經濟齊齊進入多事之秋,投資者應提高警惕!依家美國貧富懸殊程度已超過一九二九年水平,250年嘅革命周期啱啱由底部回升,革命浪潮極有可能席捲歐美。

道指舊年累升7.52%,再創新高,但係過去幾年聯儲局瘋狂印鈔,目前只係繁榮嘅假象咋,美國正一步步走向泡沫,真係神仙都難救!道指近半年嘅升幅並冇成交量支持,目前已經到咗B浪頂位,相信今年首季至次季將會係佢爆破之時,以波浪理論計,美股未來三年將大幅下跌九成,港股都冇運行!

歐洲失業驚人難睇好

Kitty:嘩!原來你暗啞底係大淡友!

許:我有嗰句講嗰句咋。歐美同日本等國家全部洗腳唔抹腳,債務遠超GDP可以嘅負擔範圍,邊有可能還清啲債。特別係歐洲失業情況驚人,廿五歲以下歐洲青年失業率郁啲可以去到兩、三成,或者更甚,所以千祈唔好見(股票)平就「舂」埋去!如果配合戰爭周期再做分析,美國53.5年嘅戰爭循環周期剛從底部回升,未來十多年都好難有覺好瞓,國際糾紛隨時演變成大規模戰爭。

彩兒:你一味唱淡,同孖妹嘅好友形象唔太夾喎。

許:我都識唱好o架,哈哈!美國喺多輪QE後,各國對美元信心下滑,特別係亞洲國家逐漸捨棄以美元作為儲備資產,令美元地位下降,而黃金價格已經貼近成本價,預計今年上半年可見大底,未來三至四年可彈升四至五倍,更可以成為Best Buy(首選)資產!

不過,如果要講最佳嘅投資策略,依家我都仲係睇唔通、望唔透,最好唔揸、唔沽,等黃金升浪來臨,首步部署黃金,下一步先到白銀。要緊記唔做唔會輸,有十足把握先好做嘢!

高妹、彩兒

若有料報畀高妹同彩兒或有嘢問,可電郵money.biz@opg.com.hk