今晚係平安夜，普天同慶，相信好多公司都喺一兩日之前開咗派對慶祝。作為普通員工，如果有超高級管理層同你一齊開派對，通常都令氣氛變得好生硬，玩得冇咁盡興。不過，絲絲最近聽咗領匯（00823）嘅個案，真係值得其他公司多多學習。
領匯嘅好姊妹向絲絲爆料，話佢哋二百幾人前日喺公司派對入面食食吓嘢，突然走個聖誕老人同埋薑餅人入嚟派禮物，聖誕老人係項目及資產發展總監梁玄狄扮嘅，OK啦。
咦？但嗰個咁Cute仲有肚腩仔嘅薑餅人，原來係CEO王國龍扮嘅。作為千億上市房託嘅主帥，肯放下身段與眾同樂，點會唔令員工興奮呢？
既然老闆玩得咁大嚟踩場，點都要放低啲貴重嘢先走得啦！
月初公司已有內部電郵，叫大家講低啲聖誕願望。老闆嚟到即刻公布「願望成真」嘅幾位幸運兒，佢哋分別得到額外多一日年假，下年一月份月薪加幅5%，以及「企業員工購股計劃」獲得雙倍僱主供款等，連同會後抽出嘅幸運兒，一共有30位員工願望成真，真係過咗個奇妙嘅聖誕！
余絲韻