被視為股神巴菲特炒股接班人嘅巴郡投資組合經理庫姆斯（Todd Combs）及韋斯納（Ted Weschler），過去兩年投資回報都跑贏標指，甚至老闆巴菲特，但今年就運滯到幾乎淪為「燈神」，恐怕連標指都跑輸，其中韋斯納拍板嘅通用汽車（GM），股價受回收汽車影響，截至禮拜四收市全年累跌22.3%。
同唔少大鱷一樣，兩位都畀油價暴瀉搞到雞毛鴨血，庫姆斯押注嘅建築工程商Chicago Bridge & Iron，因為染指原油上游業務而遭到連番洗倉，股價今年累瀉51.1%。佢哋仲持有美國採油設備生產商龍頭之一National Oilwell Varco同Suncor Energy，股價分別累挫11.1%同8.9%。
之不過兩位又唔使氣餒，話晒今年環球股市鬼咁波動，分析員都覺得唔怪得晒一向放長線釣大魚嘅佢哋。
更何況股神自己今年都猛咁撞板，比亞迪（01211）過去兩日失驚無神勁跌18.7%、英國超市Tesco股價因誇大盈利而累挫47.4%，搞到佢老人家要公開認錯兼損手離場，愛股可口可樂今年回報亦輸畀標指，因此三師徒算係打成平手啫，絲絲喺度祝佢哋出年旗開得勝！
余絲韻