絲絲講場：Uber攤開盤數振士氣

Uber近排負面新聞可謂接二連三，先係乘車安全問題，再遭國家拒諸門外，好彩Uber近排連忙宣布喜訊沖喜一下。好似日前宣布內地互聯網巨頭百度入股外，啱啱再嚟單首度公開營運數據，好讓一眾投資者安心先。

Uber呢趟係前所未有咁公布咗佢哋嘅服務人數。原來，Uber每日平均接送100萬人次乘客，全年加埋即係有1.4億人次乘客。相比起1年前一份文件嘅數據，話Uber一星期接送85萬人次，今次官方公布嘅數據可以話係大躍進。唔係點值得最新估值成400億美元呀！

至於早前傳出乘客乘搭Uber租車發生安全問題令大家信心驟降。為咗扭轉呢個形象，Uber話將會通過生物識別掃描，對旗下司機進行「起底」，又提供一啲可以畀乘客喺緊急時聯絡親人嘅工具，希望可以恢復乘客嘅信心！

余絲韻