絲絲講場：友邦馮裕祺大廚上身
識下廚嘅男士幾時都咁有市場，友邦強積金CEO馮裕祺（Stephen）尋日就大Show廚藝，整咗個Fusion甜品畀絲絲試吓，氹得絲絲甜到入心。
話說尋日去食中法私房菜，西裝骨骨嘅Stephen就話平日好中意搵好嘢食，呢排仲跟私房菜大廚上咗幾堂，學整Fusion甜品。絲絲見到Stephen咁有心思學整甜品，第一時間梗係八卦吓究竟為咗邊位佳人下廚，Stephen就神神秘秘咁話，都係想聖誕節氹吓班朋友仔開心。
整法國菜似模似樣
點知食到一半，Stephen就偷偷地換咗一身廚師服，仲霸咗Open Kitchen個廚師位，即席示範法國名菜紅酒煮啤梨嘅變奏版 ── 紅酒煮冬瓜！
一身廚師服嘅Stephen唔單止造型睇得，煮起上嚟真係有板有眼，仲話由於係法國甜品嘅關係，特登擺咗條靚靚嘅小葱伴碟，氹得絲絲未食已經變咗甜絲絲。
講開又講，近排保險行頭又見到新一輪併購潮，Stephen就話友邦唔會「主動」進行收購以增加市場份額，友邦目前嘅強積金管理規模佔整個市場份額9.8%，排名第三大。
余絲韻