絲絲講場:大摩MD籌款報佳音

摩根士丹利搞聖誕唱歌慈善籌款,已經成為每年嘅傳統節目。

今年亦已經係大摩連續第18年支持「愛心聖誕大行動(Operation Santa Claus)」,兼且係第12年辦「摩根士丹利董事合唱團」,繼續大堆頭,召集大摩在港六十幾位MD(董事總經理)高層參與,而且又破籌款紀錄,有超過330萬元善款捐畀「彩虹計劃」。

今次愛心聖誕大行動,尋日喺大摩總部ICC搞,由大摩今年新上任的亞太區聯席首席執行官高浩灃領唱。

「彩虹計劃」助自閉童

佢帶領同事贊助嘅逾六十位高層唱8首聖誕歌,全程由香港保護兒童協會嘅小朋友伴唱,大摩又整咗分貝測量器,量的係在場人士的掌聲來選出最受歡迎的一組,所以現場夠晒聖誕氣氛。

今次亦係大摩第二年為「彩虹計劃」舉辦籌款,主要係幫助患有自閉症嘅兒童走出黑暗,而幫助小朋友亦一向係大摩全球援助服務嘅宗旨。

賣蛋糕加合唱籌330萬

而大摩內部亦喺上星期率先搞咗個焗蛋糕籌款,由大摩香港同事親手整愛心蛋糕同甜品,經內部網上拍賣競投,由於凡出價者,不論係咪投到都會捐出善款,所以由上周一至五,每日推出三至五款蛋糕,一共累積籌到9.9萬元。

其中最貴嘅一個蛋糕投到3萬元,加埋今次MD合唱團善款,金額超過330萬元,比舊年紀錄又多咗超過10萬元。

余絲韻