Market Insight：港股轉弱「有排震」

伊朗石油部官員Memarian估計，一旦油組爆發減價戰，每桶油價可能直插去到40至50美元至煞到掣。到底會唔會係伊朗倡議減產被拒，專登發晦氣？但街外睇油跌落50至60美元的人，近期卻愈來愈多。

中國十一月通脹數據跌到1.4%，通縮魔爪來犯已漸見端倪。依家走入去銀行，做人民幣定存閒閒哋3至4厘，一個月上海同業拆息亦見從十月低位3.8厘彈番上近4.5厘，內地實際利率（資金成本減通脹）逼近○九年金融海嘯以來的高位，配合埋油價大插水，進口大宗商品價格下跌（十一月進口負增長可見），大行估人行明年有兩次減息機會。

古勝冇點你2014/12/12

萬里長空

睇落仲係保守咗啲啲，人民幣匯價十月高見過6.1083（執筆時是6.1889），隨着美國貨幣政策回到中性甚至逐漸趨緊，中國卻走着相反方向，人民幣可能已經見咗中短期個頂。

聯儲議息 美股波動

希臘提前總統選舉，地緣風險及歐債危機呢兩個掟貨理由，又被人喺雪櫃攞番出嚟翻叮。希臘十年期國債由一個月前5.4厘左右抽到最高8.65厘，道指隔晚借勢狠插268點收報17,533點。點解話希臘問題純綷藉口，睇番其他歐盟成員，包括經濟底子麻麻的「雙牙」，國債孳息率郁都唔郁吓，就知華爾街都係搵嚟插。

事實上，上周美國公布十一月就業數據爆晒燈，非農職位增長遠勝預期，依家利率期貨顯示，美國明年六、七月將開始加息。下星期二、三聯儲局會議，會唔會將一段長時間維持低息的承諾從聲明中剔除，睇嚟可能性唔細。由於修訂聲明後半年加息，要畀時間金融市場做好心理準備，共識是要六個月時間左右消化，意味就算今次會期唔改，下一次即明年一月都好難避免。

睇番上一次十月會議，美股就係驚耶倫改聲明，道指由17,350點插到落15,885點，最後無事，先炒到上17,991點的歷史新高，但已經令唔少美股好友食驚風散食到飽，未來幾日斷估美股仲會相當之波動。

中資金融股要抖氣

古勝睇見個市真係無胃口，周二跌五百幾點，之後彈得38點，零頭都追唔番，隔晚美股跳水，A股又立立哋，路邊社傳國開行放水，中央要求銀行要盡量協助房貸，都推唔起個A股，只係跌少啲咁大把。中港兩地中資金融股，看來需要時間消化過去一個月瘋狂升幅。

港股昨日即市跌穿過十一月中低位23,252點，去到23,169點，收市又死唔晒，跌211點收23,312點。經過八日過千億成交之後，昨日主板成交縮返落980億元，超過950隻股票向下，無論指數股與二三線股都跌得幾全面，相信短線市況仍然波動，散戶要綁好安全帶。

個市唔就，資金湧晒落去無乜蟹貨的新股身上。中廣核電力（01816）昨升9.3%收報3.62元，消息話有唔少國際配售時向隅的傳統基金買盤，仲有睇中廣核電會好快入到MSCI的指數基金搶貨。在下唔打算阻大家發達，但IPO價累積三成，22倍PE，投資吸引力已經麻麻，有貨係都要賺到盡，或者等埋入指數就要諗吓計數。

油價插水，「三桶油」及油服股一彈又散已經預咗，航空股繼續借低油價古仔炒到飛天，東航（00670）破頂，升8.5%收4.05元，國航（00753）升5.3%收6.49元，南航（01055）升4.3%收3.86元，如果之前無跟買東航，想搵隻慢火煎魚，查實國泰（00293）市帳率得1.1倍，可以諗諗。

創維發CB或有後着

電視股創維數碼（00751）計劃發售可換股債券（CB），集資唔少於13億元，初步兌換價5元，較停牌前4.2元高出19.05%，大股東承諾包銷。吸引到在下留意呢單消息，一來係中期業績顯示佢手頭現金減負債應該仲有二十多億元，更重要係，佢二○○○年上市以來一直無伸過手同街外股東要過錢，批股供股都未試過，突然轉性發可換股債券集資？

創維通告話重組公司物流業務以及開發新業務，包括冷氣機業務所以要錢，睇嚟小股東要密切留意住公司係咪有大動作跟尾。

古勝