絲絲講場：數據中心搵客 和環大小通吃
和記環球電訊數據中心主管李煜祥話，租公司Data設施嘅大客通常係大大間跨國金融機構及銀行，佢一般都唔方便透露客戶身份，但有位「大客」因分屬老友可以開名，就係舊年八月成為租戶嘅企鵝仔騰訊（00700），佢話騰訊「係大客，但唔係最大嗰隻」。
李煜祥話喺黃竹坑嗰間數據中心依家租咗六、七成，公司好睇好行業發展，有信心黃竹坑同葵涌兩間數據中心未來兩年就Full晒，所以一直都搵緊地想起新數據中心，佢仲同絲絲講，佢哋做生意係大小通吃嘅，即係除咗騰訊大客外，都好歡迎中小企租戶。
擴充選址遍及歐亞
兩家數據中心現時由和記電訊（00215）同長實（00001）一半一半合資開，總投資額超過5億元。
佢哋又真係乜嘢地方都會諗，會睇香港、九龍、新界都仲未夠，竟然答埋睇歐洲同東南亞，真係路路包抄。進展成點先？李煜祥就話，仲喺周圍睇緊，都係有心水先再Plan啦。
做人同經營公司一樣，最緊要有目標。李煜祥話，長遠目標係喺香港市場入面，以數據中心總面積計做到前3名，依家就排第6。換言之，至少都仲要做得大過前面三個競爭者。
余絲韻