Market Insight：四環博反彈贏面高

即使A股真係熊出沒太耐，未入市的購買力再多都好，都無可能日日交出近萬億元人仔成交，推A股指數坐火箭，以九十度角升空。周二，因為內地券商考慮收緊孖展傳聞，以及中國證券結算公司為中央清理地方債務進一步規範化，部分質素較差項目跌出被拯救範圍，引發債市「黑天鵝」出沒，股市水緊疑雲致A股急挫。

睇幾間大行評論，都認為措施對股市影響是心理大於實際，只要人行減一次大約50至100基點存備率，已足以解決有餘。講到底，只係A股炒得太癲，趁消息來一次震倉，把實力較次的孖展客驅逐出場。

古勝冇點你2014/12/11

萬里長空

事實睇番個市，前日暴瀉的中資金融股，跌勢有轉趨穩定的迹象，短線調整夠未？古勝認為仲係五十五十，反而，之前基金經理透過掟其他增長股，換入中資金融股的情況有逆轉迹象。昨日整體大市上升股份984隻，升跌股份比例是64對36，係過去一個月以來最高。

資金換貨撈優質股

似乎過去兩星期，中港股民所謂的「滿倉踏空」（揸到成手貨在指數上升下仲要輸錢），形勢開始逆轉，如果內銀、內險及券商真係需要抖抖氣，其他早排無端端被質到一仆一碌的優質股，可以優先考慮撈底。

宏觀睇，早排石油輸出國組織決定唔減產，同美國的頁岩油氣商攬住死，大家累鬥累搞到環球油價跌到五年新低之後，石油同煤炭等能源股，暫時都唔使諗住。在下甚至懷疑，一旦油價如最悲觀的預測，直插去40美元一桶水平，屆時可再生能源的商業價值，各國政府包括中國，鼓勵發展的積極程度都可能打上折扣，比亞迪（01211）彈都唔彈的走勢，可以見到一二。

內地管道燃氣發展，在中俄簽訂長年期供氣協議，而內地城市管道建設首階段到位，衰啲講已經洗濕個頭，焗住要推，如果博反彈，新奧能源（02688）應該可以首先留意，早排因為向大股東買資產，股價偷步跌咗落嚟，現價返到大股東增持的46.1至49.9元範圍中下限水平，諗得過。

網上售藥添新商機

揀正路的非金融類股份，應該係水務及醫藥股。醫藥股整體而言，喺昨日的非金融股報復式反彈中升得最勁，皆因市傳《互聯網食品藥品經營監督管理辦法》，可能在明年初頒布，意味醫藥有可能發展到電子商貿市場。

老實講，乜藥可以放上網賣，乜藥唔得，在下唔係專家，唯獨係基金如果要乾坤大挪移，在金融股食胡，買番增長醫藥股，理論上會搵市值大、交投量足夠容易買齊貨的行先。昨日四環（00460）、石藥（01093）及中國生物製藥（01177）升幅介乎4.5至8.6%，成交唔少，應可睇高一線。

三股之中，四環今浪都真係跌得唔少，由十月中6.68元，殺到落去周二見4.78元，跌近三成。本身無病無痛，純粹因為基金掟增長股換大落後金融股受累，以一五及一六年預期增長23%，一五年預期市盈率20.3倍，尚算吸引，昨日一彈，沽空飆升至1,600萬股，股數計係三個月新高，會唔會挾到淡友好難講，以股論股，現價5.27元，短期升番一至一成五，唔算奢望。

中廣核電力（01816）昨首日掛牌，遇啱前日大跌市，暗盤所見都無出面街傳到三成五開外咁誇，昨以3.45元開出，收3.31元，較招股價2.78元升0.53元或19%，以全日高低位3.48及3.28元，貼住後者收，都算有少少反高潮。睇番最集中成交在開市一刻的「U盤價」3.45元，全日拉勻平均成交價3.37元，即係話即日鮮收市投降的，應該係輸多贏少。

中廣核電唔算標青

雖則話基金配售打崩頭，但睇IPO的102張認購2.2億股的頂頭槌飛，分配率有0.6%或132.3萬股，老實講，係比預期多，以厘半孖展，頂頭槌飛都係講緊2.91元左右成本，執硬之下，U出街有一成九回報，試問大飛客點會唔心動。收市價3.31元，計落一四年PE啱啱20倍，話就話核電一哥未來幾年唔難交出一成五至兩成增長，但放埋火電股8、9倍一比，諗住等中廣核電跌落嚟長揸，似乎長遠勝算又唔算好高。

古勝