絲絲講場:永明CEO走得最快

絲絲一直以為做得CEO一定身懷一個肥肚腩,但嚟自荷蘭嘅永明金融CEO夏哲偉(Wim Hekstra)身高六呎又Gentleman,唔單只係保險界「高富帥」嘅代表,而且仲係「全港跑得最快嘅CEO」。

個半鐘跑完半馬

阿Wim身形咁fit,一睇就知道係運動健將,平日除咗玩開足球、曲棍球同三項鐵人之外,上個月先啱啱贏咗UNICEF嘅三千米CEO RUN。

對於跑半馬21公里都係只需要1小時34分嘅Wim嚟講,跑贏一班肥肚腩CEO可以話係無難度,佢仲講笑咁話絲絲識到全港跑得最快嘅CEO,約定下年一齊再跑過咁話。

MPF業務年增18%

Wim作為全港跑得最快嘅CEO,其實唔止跑步快咁簡單,佢加入永明短短一年,已經帶領旗下強積金(MPF)業務增長達18%,跑贏同業。而佢嘅管治之道都同運動好有關,就係「Play win, don't play defense」,即係同出名擅長進攻嘅荷蘭足球員一樣,進攻就係最佳嘅防守,唔打防守戰,果然係嚟自荷蘭嘅代表。

余絲韻