絲絲講場：夏偉信為保育周身泥
AXA安盛早前宣布出售旗下強積金業務予信安，但睇嚟絲毫冇影響到員工士氣。AXA安盛行政總裁夏偉信早前就帶埋一班管理層成員嚟到下白泥泥灘，身體力行清理廢棄物同埋垃圾，保育馬蹄蟹生態。
時時面帶笑容、熱愛生活嘅夏偉信，原來對生態環境都相當關注。佢話，今次活動唔單止係為咗清理泥灘，更重要係提高大家對保護環境嘅意識。如果每個人都願意多走一步推動可持續發展，就係對環境保育上嘅一大進步，從而提高香港人嘅生活質素。
體會保護環境重要
夏偉信話，嗰日佢哋係清理泥灘上嘅石樁、廢棄嘅魚網、蠔殼及垃圾，深深體會到保護環境嘅重要性。見到平時西裝骨骨嘅高管層都願意為環保事業整到周身係泥，我哋仲有乜理由對環境污染視而不見、不管不顧呢？
余絲韻