帝盛酒店（02266）太子女邱詠筠（Winnie）打理嘅酒店版圖愈來愈大，成日飛嚟飛去，真係忙到不得了，尋日絲絲見到Winnie清瘦咗唔少。不過，佢話唔單止因為忙，原來佢係刻意減肥嘅，仲分享咗個七日排毒減肥餐單出嚟，佢自己試過好得，依家連屋企人都一齊試緊，仲講笑話目標全家人一共減肥100磅咁話！
其實Winnie接手咗酒店業務以嚟，成績真係有目共睹，品牌搞到有聲有色。佢好開心話，英國酒店業務依家已經逐步上軌道，入住率都有70%，相信等酒店經營成熟後，入住率有信心去到90%，仲話會繼續喺英國物色合適嘅發展機會喎。
講到佔中嘅影響，公司就話，入住率冇變，係房價有啲影響，因為少咗外國遊客嚟，做多咗內地團就會令房價有壓力，不過依家睇聖誕節訂房表現都唔差喎！
余絲韻