絲絲講場：永隆私銀吸客的藝術

香港隱形富豪多，內地富豪又鍾情香港嘅銀行Service，令私人銀行生意源源不絕。不過，吸大客都好有技巧，絕對唔係靠收費平，好似永隆私人銀行咁，知道中港高端客追求藝術品味，就邀請佢哋出席國際拍賣行佳士得（Christie's）嘅一系列秋季拍賣活動。

連絲絲呢個外行人都知呢類國際拍賣行專做高檔拍賣，相信私銀客戶們唔多唔少都有啲興趣睇睇。今次嘅拍賣品包括明清珍罕中國瓷器同工藝精品、中國書畫大師吳冠中同徐悲鴻嘅名作、趙無極同張曉剛嘅亞洲當代藝術作品，當然唔少得女士最鍾意嘅珠寶名錶，同埋嚟自波爾多頂級酒莊嘅名酒等等。

永隆私銀客今次好夠面子，獲邀參加專為佢哋設計嘅「亞洲二十世紀及當代藝術」導賞團，佢哋同絲絲分享，喺拍賣會成功買得心頭好，大讚永隆夠貼心。

講開呢次秋季拍賣會，係由十一月廿二日至廿六日舉行，舉辦地點喺香港會議展覽中心，各位想感受一下藝術氣息嘅話，就唔好錯過呢個機會。

余絲韻