絲絲講場：通車紀念封添加值
雖然滬港通開局反應麻麻，但無損港交所（00388）行政總裁李小加心情，尋日一個飯局中，小加總裁High爆，應大家要求，好似大明星咁，喺港交所送嘅滬港通紀念首日封上逐一簽上大名。
攞手機Show全家福
港交所為咗紀念滬港通成功推出，發行咗幾百份滬港通首日封同郵票，由於數量有限，真係有錢都買唔到。依家仲有埋小加總裁嘅簽名，唔知可以「炒高」幾多倍呢？
小加總裁仲主動攞手機出嚟Show埋全家福，包括太太、老大（大女）、老二（大仔）同老三（孻女）嘅玉照畀大家睇，仲話老大、老二已經讀大學。
港交所主席周松崗早前爆料話小加去不丹旅行，但因為滬港通要腰斬旅程，撇低妻兒趕返香港開會。就嚟聖誕節長假期，小加會唔會再去多不丹一次「補飛」？小加就話唔去喇，會去比較暖嘅地方過火熱聖誕！