絲絲講場：趙世曾狂賣古董起樓
卓能集團（00131）主席趙世曾上個月畀賊仔入屋爆竊，損失過千萬。佢話依家「屋企值錢嘅已經拎走晒！再冇值錢嘢」。為免夜長夢多，兼且因為多得滯，怕自己睇唔晒，佢仲已經賣咗三分一嘅珍藏古董，索性套現用多啲錢起樓好過喎。
發生啲咁嘅事大家都唔想，事後佢已經請多幾個保安，巡多啲，又請防盜公司幫手，全面加強保安。趙世曾對古董好有研究，佢話投資古董嘅回報仲和味過股票好多。「幾十年前買個古董幾千蚊，依家已升值至幾百萬。」
不過點講都冇地產咁好搵，加上佢自己「唔識沽空投機」，所以公司依家主力做地產老本行，就算滬港通開通都唔多掂股票。
另外，佢大女趙式芝（Gigi）升做副執行主席一個月，趙世曾話未來會慢慢交吓啲工作畀Gigi，「希望佢勤力啲」，以後盡量一齊開會，有事就一齊商量。
總部唔急住賣 等靚價
咁點睇佔中呀？佢話香港有七成人都唔贊成，佔落去都冇意思，希望「快啲結束，快啲好世界。」
好彩嘅係，對公司影響就唔大，不過覺得繼續佔落去長遠都會影響香港喺國際嘅地位。佢又講到，依家唔等錢使，唔會急住賣總部灣仔卓能廣場，等到價啱先算。
余絲韻