絲絲講場：駕馭騰雲 華誼有一手
騰訊（00700）主席馬化騰與阿里主席馬雲，喺內地科網與電商行業激鬥連場，同佢哋合作嘅公司亦經常被指要喺「騰、雲」兩大陣營作取捨。不過凡事都有例外，喺深圳上市、從事電影製作嘅華誼兄弟，就示範何謂左右逢源，同時引入馬化騰同馬雲做股東，仲可以跟騰訊同阿里各自開展近似嘅合作。
持股華誼同為8.08%
電影粉絲對華誼兄弟應該唔會陌生，佢哋出品過多套又有票房又有口碑嘅華語電影。今次能夠左右逢源，係因為華誼配股，包括騰訊、馬雲私人持有杭州阿里創投、平保（02318）旗下平安資產及中信建投都變成股東。其實馬化騰同馬雲一早已經係華誼股東，今次只係增持，但華誼又做得好「得體」，增持之後兩人持股相同，冇多冇少都係8.08%。
阿里騰訊各自搞影視
唔單只股權「平等」，華誼亦會分別與騰訊及馬雲旗下嘅阿里系，開展電影及新媒體等內容嘅合作。
華誼何解能左右逢源？原來馬雲私人參與嘅雲鋒基金多年前已入股華誼。騰訊喺一一年能首次入股華誼，更係拜雲鋒基金減持所賜。騰訊同阿里近年競爭趨於劇烈，亦無損華誼與兩者嘅合作。
余絲韻