美國《財富》雜誌本年度50位商界風雲人物榜出爐，Google行政總裁佩奇力壓蘋果公司舵手庫克登上榜首，佩奇仲被形容為全宇宙最野心勃勃嘅舵手。
因為喺佢領軍下，Google唔單止係一台賺錢機器，更加熱衷於投資新科技，呢啲新科技隨時改變人類嘅生活，甚至讓Google未來幾個世紀繼續擔當科技界領頭羊。
「Google X」專玩高科技
《財富》指出，佩奇掌舵Google超過三年，核心業務例如搜尋、廣告、地圖、流動程式、Gmail電郵、Chrome瀏覽器、影片分享網站YouTube同埋Android作業系統，樣樣都愈做愈強。
不過，「異想天開」嘅佩奇眼光放得更遠，秘密實驗室「Google X」正在進行嘅工作就包括開發無人駕駛汽車、高空風力發電、利用氣球發射網絡，以及利用納米粒子監察疾病等等。
對於外界批評Google將從核心業務賺來嘅錢投進「幻想」上，佩奇一於少理，話自己只係單純追求對世界有正面影響嘅事情，同時避免重蹈其他大型科技企業主攻一項專長，最終步向式微嘅覆轍。
而內地科網巨頭中，阿里主席馬雲排名第10，百度創辦人李彥宏同騰訊（00700）主席馬化騰就分別排喺第39同埋46位。
余絲韻