孖妹S檔案：匯戰開打 好淡全攻略

美元長升 圓匯沽落120

王：星展香港財資市場部執行董事 王良享

彩兒：美國宣布退出量寬第二日，日央行就接力印銀紙，令每百日圓兌港元低見6.75水平啊！

王：日本喺四月增加銷售稅後，通脹短期上升後無以為繼，九月份核心消費物價指數升幅得3%，撇除銷售稅後升幅就只得1%，仲連續第四個月錄得升幅收窄，如果趨勢持續，央行早前制訂一五年中通脹2%嘅目標就達唔到標，再加上當地次季GDP同比跌幅達7.1%，收縮比政府預期大，所以無可避免加大購買資產項目規模。

陳健豪稱，會以加息時間決定沽日圓平倉位。

部分外匯投資工具簡介

美國聯儲局近期作風傾向鷹派，相信美匯強勢會直至明年加息前兩至三個月，以我預期七月開始加息計，強勢會直至明年三至四月，成為壓低日圓匯價嘅外在因素。不過，市場避險活動有機會令日圓間中出現波動，相信未來三個月會喺111至116日圓兌1美元波動，明年更可低見120水平，散戶大可趁機部署沽空。

Kitty：仲有乜外幣值得「空襲」？

王：我都睇淡歐元o架，不過佢下跌空間唔似日圓咁大。日本推低日圓嘅目的係推高通脹，不過我好懷疑歐洲係咪有同樣目標。事關歐元區低通脹嘅部分原因係銀行去槓桿化，同埋勞工架構改革，呢啲措施有利歐元區經濟前景，加上當地係福利主義社會，所以歐洲怕通脹多過通縮，應該唔會好似日本咁購買資產項目。但係歐洲經濟勢維持低增長，美元強勢會推低歐元，預計歐元兌美元未來三個月會喺1.24至1.28間徘徊，未來一年將跌至1.22，不妨喺1.28水平做淡。

好友睇位揸英鎊紐元

彩兒：我都係鍾意做好友多啲，有乜係值捧o架？

王：雖然英國九月份消費物價指數只係按年升1.2%，但係我覺得低通脹只係短期現象，而且以英倫銀行慣例睇，低通脹其實唔會妨礙加息，預計當地全年經濟增長有3.1%，好過美國，如果佢經濟喺未來三個月仲保持強勁，喺三至四月有大機會加息，我相信英國未來幾年經濟增長企穩3%以上，所以睇好英鎊走勢，三個月內英鎊兌美元可高見1.65，建議喺1.6以下分段收集。

紐元七月高位為0.8823美元，至今下滑約12%，跌到過晒龍，顧及中國取消一孩政策有利新西蘭奶品出口價格，目前價格回軟只是大漲小回，而且現時係五十歲以上內地人移民當地嘅高峰期，呢班人財力雄厚，有助當地經濟。紐元息口達3厘以上，出年更有機會跟住美國加息，可等紐元兌美元回落至0.77水平低吸，未來一年可上望0.84。

生活細節覓匯市機遇

陳：ADS Securities零售市場銷售總監 陳健豪

Kitty：炒外匯要一眼關七，我有少少想放棄啊！

陳：其實外匯緊貼我哋日常生活，你可以喺生活攞投資靈感o架！○七年我去過日本旅行，當時日圓匯價係120水平，但喺直到一二年嘅短短五年間，日圓已升值五成，實在太誇！當地經濟疲弱，債務佔GDP比例極高，基本上冇條件升值，其後安倍晉三上場，我就喺一二年、日圓大約78水平開始買美元沽日圓（槓桿式外匯交易），喺85已平倉。

我一路等靚位再入市，最終今年五月、日圓見102水平時，就再用六位數字金額買美元沽日圓，並將槓桿控制喺十倍內，以100為止蝕位，更持倉至今。我會以日本係咪再推銷售稅及美國加息嘅時間決定幾時平倉。

物價變遷睇匯率去向

彩兒：一個國家嘅匯率長期太低或太高，就會對經濟造成重大影響，澳洲就係其中一個例子。

陳：我姨媽移咗民去澳洲，佢一一年嗰陣問我，澳元已經係近三十年高位，應否兌換澳元為港幣。當時即刻刺激到我嘅投資觸覺，試想像以前用十港元已可買到當地一個麵包，當時竟需二十港元，可見澳元匯價應該係時候調整。當地一一年十一月開始減息「谷經濟」，立即令澳元回落。

美元都處於同樣情況，佢自○二年高位一直回順，相信已進入回升周期，喺環球貨幣相對弱勢下，只係持有美元或港元，翹埋雙手乜投資都唔做都會賺啦！

外匯進階玩法全面睇

有啲人一聽到「外幣」就覺得「娘」，查實除咗直接買現貨，外匯投資尚有多種玩法。

中風險 二元期權鎖定賺蝕

外匯二元期權風險中等，勝在散戶開倉時就已知潛在回報或虧損。一般利用貨幣存息做期權金，投資者預測外匯價格漲跌方向，然後決定投資額，再同金融機構議定回報、行使價及結算周期。

結算時，如果看漲交易結算價高過行使價，或看跌交易結算價低過行使價，就賺到回報。如果市況不如預期，就會輸咗議定嘅回報。近年市場熱門選擇係看漲人民幣，入場費約30萬港元。

中風險 掛鈎存款有機輸凸

外幣掛鈎存款結合定存及認沽期權，有保本同非保本兩類，息口分別係1至2厘及10厘以上，唔受香港存款保障計劃保障。投資者要存入存款貨幣並選定掛鈎貨幣，再同金融機構協定掛鈎貨幣兌存款貨幣的匯率同存款期，入場費約10萬港元。

以開立紐元掛鈎存款為例，若到期日紐元走勢一如預期向好，就會收到本金及利息；一旦紐元疲弱，本金同利息就要以協定匯率兌換成紐元。撇除利息收益，紐元價值有可能低過原來本金。

高風險 外匯孖展止蝕重要

進行槓桿式外匯交易（外匯孖展），投資者需存入合約總值某個百分比金額做保證金，市面上普遍最低開倉水平及維持按金，分別係合約值5%同3%，槓桿比率可以高達20倍，並且有補倉或被斬倉嘅可能，入場費約15,000港元。

如果只係按最低按金要求落盤，匯率嘅小變動隨即會產生高比例盈虧狀況，所以應降低槓桿比率同風險，最緊要係時刻訂立止蝕位！