提到智能手機，大家好自然會諗起當今兩大巨頭Apple同三星。不過，自從愈嚟愈多國產廉價智能機以「性價比」冒起，Apple同三星喺內地市場真係畀佢哋搶晒風頭。
之不過，絲絲收到消息，周四就要公布第三季業績嘅三星，為咗重振聲威同埋安撫股東，打算將內地市場嘅智能手機價格下調10至20%，中國同胞有福喇！
三星嘅收入有近2成源自內地市場，但由小米出現開始，三星就似乎開始慢慢畀人爬頭，第二季內地嘅市佔率排名仲畀小米超越（小米佔18%），同另外二個國產品牌酷派、聯想並列第二，市佔率各得12%。咁跌法，唔到三星唔心寒！
市場調查機構Canalys指，三星為咗清貨同搶番內地市佔，有意將手機減價1至2成，仲計劃首先喺中國推出Galaxy A系列手機，以具備S系列功能嘅低價機吸客。至於喺香港，我哋就無咁嘅着數喇！
有分析指三星之所以要等到今時今日先知出手反擊小米，皆因貴為全球智能手機銷量一哥，為咗保持高端形象，執意唔肯減價。如今行到呢步，睇嚟三星都真係冇晒辦法。
講開小米，有印度媒體指，當地空軍叫自己嘅家人同隊員唔好用小米，怕佢哋嘅私隱會洩漏畀北京。好彩小米都好快諗到對策，佢哋將會喺印度建立新嘅數據中心，咁樣印度用戶就可以放心啦！
余絲韻