絲絲講場:陳鏡沐離開信銀志在千里

信銀國際司庫陳鏡沐(Woody)返埋尋日,就離開効力六年嘅信銀國際,佢趁機搵相熟傳媒午膳,同絲絲大讚過去同事之間合作好愉快,而過檔之前就會去個旅行叉電先,然後再履新。

過檔渣打前遊東灜

Woody話信銀國際管理層臨別送咗份紀念品畀佢,係由行政總裁張小衛挑選嘅水晶千里馬,擺設嘅題字寫住「志在千里」,睇嚟一眾管理層對於佢更上一層都感到好開心。

Woody十一月就會正式過檔渣打香港,開頭應該有排忙,佢話嚟緊會先去一轉日本,包括東京同北海道自駕遊,絲絲認為呢種天氣外遊叉電的確係事半功倍,仲要呢排日圓喺低位徘徊,Woody好坦白話以前低位儲落唔少日圓,已經趁高位沽咗,展望日圓仲有得跌,大家要遊東灜就要多加留意喇。

金融海嘯之後大眾都愈嚟愈重視財資市場,Woody經常出嚟同大家分享睇法,所以都係傳媒之友,希望佢到渣打履新環球市場主管之後,繼續分享心得。

余絲韻