清華大學近日認真架勢，竟然同時間有全球三大科技界猛人喺度聚會，真係好犀利呀！
佢哋三位，一個係阿里巴巴董事局主席馬雲、一個係蘋果公司嘅CEO庫克，而另一個呢，就係facebook嘅創辦人朱克伯格。呢個組合真係可以用百年難得一遇嚟形容，如果唔係見到佢哋三個坐埋一齊嗰張相，絲絲都真係唔敢相信呀！
聽啲學生講，朱克伯格已經喺日前畀清華請咗去做經管學院學術顧問委員，佢日前仲應邀進入一個教授經管嘅課堂上面，用中文完成全個訪問；而佢上個月又請咗20個清華學生做工程師，就連辦公室都已經一早租定北京嘅核心專區，睇嚟朱仔為咗打入中國市場，都真係下咗唔少決心。
至於庫克呢，佢就話要繼續加大喺中國嘅投入，兩年內要將15間Apple零售分店增加到40間，佢又真係幾雄心壯志喎。
其實呢，佢哋三個嘅業務都可謂平分秋色，但同時亦都係環環相扣，今次因利乘便可以同枱食飯，唔知會唔會傾傾吓偈會傾出啲世紀合作大計添！
計絲絲話呢，對於朱仔嚟講，佢個facebook都已經畀中國政府由○九年封到依家；而Apple嘅手機喺中國市場今年先真正全面啟動，佢哋要打入中國市場，當然就要同馬雲傾傾啦。
阿里巴巴啱啱先喺美國上市，自不然都要靠另外兩位美國老友幫幫手。科技界嘅緊密合作屢見不鮮，以iPhone 6喺內地開售為例，阿里嘅天貓早喺10號就已經有得訂，分分鐘比內地三大電訊商官方更早有貨到手。
余絲韻