期指觀瀾：短期拋售已近尾聲
一連兩日港股的表現，明顯可見唔單只淡友控制大局，基金經理在現貨市場入市的興趣也相當低，形成每次技術反彈，淡友很快可以施以壓制。
昨日恒指早市一度見過23,231點，可惜追勢好友唔多，恒指及期指級級落，午後更跌穿開市初支持23,045點及22,998點，直到A股收市，好友才逐漸收復失地。最後恒指倒升18點收報23,088點，即月期指日市收23,106點，轉炒高水，惟現貨主板成交進一步縮減至525億元，反而期指成交回升至6.4萬張。
九月初至今期指未平倉合約，大部分時間維持12萬至13萬張之間，自從大市由九月初的兩萬五樓上級級落，到近日低位橫行，未平倉合約降至10萬張左右，就算連同十一月的6,300張，總計仲係比高位有所減少，當然不能排除資金外流，一些長短倉基金套戥的需求減少。
不過，筆者認為未平倉合約回落，也不能排除做淡的陸續在低位鳴金收兵，或者衍生工具炒家覺得睇唔通後市，所以將入市頭寸減低。從恒指MACD開始出現企穩及呈牛叉之下，看來短期港股的拋售已近尾聲，刻下只等待一個可以令基金經理重新建立信心的催化劑出現。
John Mullen