恒地（00012）副主席林高演平日畀人嘅印象高高瘦瘦、官仔骨骨，原來佢係滑雪高手，仲每年冬季好熱心咁帶埋同事到海外滑雪，真係人不可以貌相呢！
老友話，林高演呢個滑雪小組係由集團唔同部門嘅高層組成，開頭都係去亞洲區嘅滑雪場，後來演變到每年冬天去唔同嘅滑雪場，今年就應該去歐洲某個山區一試身手。當中林高演被推崇為滑得最叻嗰個，佢仲會好照顧同事，教埋同事點樣改善滑雪技術添。
不過，突然咁多高層一齊請假去玩，恒地會唔會影響運作o架？老友就話，佢哋通常都係揀啲係人都放假嘅日子出動，而且只係去幾日鬆一鬆，然後又返嚟繼續搏殺。
講開又講，「千億新抱」徐子淇雖然唔係恒地高層，但就有好多人當佢係Icon，成日留意佢出席大小活動嘅動向。
老友話，恒地公關除咗平日要照顧財經記者外，喺呢啲場合就要照顧名人版、娛樂版記者，但工作相對令人開心，就係事先問定當日子淇着咩品牌衫、用咩手袋，然後一個列表交畀記者。
望住啲咁高級嘅衣着牌子，絲絲一定買唔起，但睇吓都興奮呀。
余絲韻