絲絲講場：花旗幫學生搵工加分
依家大學生出嚟社會做嘢之前，個CV都已經要有幾份實習、Part Time打底，唔係都唔夠競爭力同人比。花旗香港就好貼心咁搞咗個「花旗集團－－社聯大學生社責實踐計劃」，等各大院校嘅80位商科學生，今個暑假喺40間非牟利服務機構做實習，累積吓工作經驗。
呢個活動已經連續舉辦咗四年，花旗銀行環球個人銀行服務香港區總經理林鈺華話，同學仔喺非牟利服務機構實習，變得更加關心社會議題，加深認識社區需要。
分享非牟利機構經驗
花旗一向畀行內人稱為「少林寺」，培育咗好多銀行界精英，仲整咗個「舊生及銀禧職員會」，不時搞吓聚餐等新舊同事見面交流吓，效果非常唔錯。今次花旗都整咗個「同學會」畀參加實習嘅同學有機會再聚首一堂，將自己嘅知識同理念繼續注入非牟利服務機構。
花旗話，「同學會」就好似另一間「少林寺」，希望「同學會」可以Keep住培養同學仔關愛社會，就算第時投身各行各業都唔好忘記今日呢份熱誠。
余絲韻