絲絲講場：美企Equinix電費夠嚇人
數據中心外形通常冇乜特別，查實好有內涵，對經濟推動好大。好似納斯達克上市Equinix公司，坐落荃灣工業區，唔好講其他，淨係用電量就已經好大「貢獻」，喺香港幾座數據中心每個月電費就超過一百萬美金，絲絲屋企每個月最多交千零蚊電費，佢哋一個月就等於我屋企交足六百幾年電費。
除用電外，數據中心由興建、請員工、日常維修、以至高層員工住屋及子女讀書，瓣瓣都牽動經濟環節。Google曾經大鑼大鼓，話喺將軍澳起數據中心，地都攞埋，好多人都話可以帶動香港發展成亞太區數據中心樞紐，最終人哋舊年話唔玩喇，搞到好多人好失望。
數據中心月交百萬美金
絲絲去過Equinix嘅數據中心，表面同一般工廠大廈無分別，但入到去就發覺保安相當嚴密，Equinix香港區董事總經理譚永耀（Alex）話，數據中心入面有過百部閉路電視，廿四小時有專人監測，每度門都要用智能卡出入，而且做得數據中心絕對要低調，所以大廈外牆就連標誌都唔會有。
估吓數據中心用咩最多？就係用電最多！主要用喺冷卻伺服器同埋供電，廿四小時運作，個個月交超過一百萬美金電費，張電費單真係嚇死人。
余絲韻