絲絲講場:麥格理實地考驗中移4G

喺香港依家幾乎男女老幼都用手機上網,大陸都唔弱,4G用戶不斷增加。與其聽各大電訊商嘅數據,麥格理一於選擇親身去測試中移(00941)嘅TD-LTE 4G究竟有幾堅!

麥格理最近變身測試員,拎住個電話喺深圳多個地方做咗訊號測試,包括華強北、市民中心站及福田口岸等十個地點,結果覆蓋率同速度都令佢哋滿意。

訊號理想 睇好前景

之前有證券行,派員工去大陸,企喺百貨公司門口,數吓有幾多顧客入去,有幾多顧客有收穫,麥格理嘅做法都係大同小異。

麥格理喺報告內提出,今次係第一次喺深圳地鐵度接收到中移TD 4G 嘅訊號,差唔多有三成測試嘅地鐵站都收到訊號,以往測試嘅數據係零!

麥格理仲話,雖然中移4G客戶不斷增加,喺戶外地方上下載速度仍保持穩定,佢哋仲相信呢兩年中移嘅4G速度同覆蓋率會愈來愈好,所以繼續睇好中移前景。

余絲韻